NImin ni 6th Vau thla 2025 (Ningani) chawhnu khan CMO Kolasib staff te chuan CMO office ah Dr. Saichhingpuii Sailo, Dy. CMO thlahna hun an hmang.

     He hun hi Dr. RK.Lalthlamuana, Sr. CMO in kaihhruaiin, Dr.Saichhingpuii Sailo, Dy. CMO kalchhuak tur chuan thusawiin, Kolasib a awm chhung rei lotea Programme hrang hrangte nen thawhhona a that zia leh CHC leh PHC a SMO leh MO te tawiawmna leh staffs te thawhpui an nawm zia te, Sr. CMO in a tha taka a thlawpna leh la tawn hriat loh tam tak a hriat thar thu te, kawng engkimah thahnemngai taka staff ten an thlawp thu sawiin, hetianga thawhhona hi nei reng turin staff te a chah a ni.

     Dr. Saichhingpuii Sailo hi Mamit District ah Sr. CMO in a awm dawn a, a hmun ruak rawn luah khata Dy. CMO turin Dr. Ramdinthari, District Hospital, Kolasib atangin a rawn awm dawn a ni.

     Inthalahna hun hman zawh a nih hnuin Chapchar Kut urlawkna CMO staff te hian an nei nghal a, Chhawnghnawh hun hmangin staff te Artui an inbarh hawng hawng a, chaw chhun eiin hun hlimawm tak an hmang a ni.