Vawiin March ni 5, 2025 (Nilaini), chawhnu dar 1:00 p.m. ah khan Govt. Kolasib College leh Office of the Chief Medical Officer, Kolasib District te chuan Memorandum of Understanding (MoU) an ziak a. Govt. Kolasib College-a zirlaite tan Counselling Centre chu College-ah hawn a ni.

     Counselling Centre hawnna inkhawm tawi neih zui niin, Pu C. Lalngaihawma, Assistant Professor, Dept of Mathematics, Govt. Kolasib College chuan a kaihruai a. Pu Lalṭanpuia Rengsi, Principal, Govt. Kolasib College chuan thu sawiin, MoU chu Office of the Chief Medical Officer, Kolasib District te nena ṭang kawpa an sign thei chu lawmawm a tih thu sawiin, ṭangkai zawka zirlaite pawhin an hman chhunzawm zel a beisei thu a sawi. 

     Dr R.K. Lalthlamuana, Sr. Chief Medical Officer, Kolasib District pawhin thu sawiin, hun lo kal zelah natna te lo tamin, tun hmaa awm lo te kha a tam tawh thu a sawi a. Mental problem te pawh natna pangngai anga ngaih tur a nih thu te, malaria kan vei a, kan inenkawl a, kan dam tawh emaw kan tih pawha a hnua kan vei leh a, kan inenkawl ṭha leh ṭhin ang hian, heng mental health problem nei te pawh hi natna chi khat anga ngaia inenkawl a ngaih thu te a sawi bawk a ni. 

     Session khatna a zawh hnuah session hnihna, "Seminar on Mental Health" tih thupuia hmangin programme hman chhunzawm a ni a. He hunah hian Pu Emmanuel R. Hmingthantluanga,

     Psychologist, District Hospital, Kolasib chuan thu sawiin mihring dam ṭha pangngaia kan ngaihte pawh rilru natna chi hrang hrangin a tlakbuak theih dan te, mi pangngaia kan ngaihte pawh mahni intihlum an tam tawhzia te, suicide rate a kum tela a pun chakzia thu te a sawi a. Chuta ṭang ringawt pawh chuan rilru hrisel (mental health) neih a pawimawhzia te uar takin a sawi bawk a ni.

     He MoU hi college naupang ten awlsam taka Counsellor te an pan ve theihna tur a duan a ni.CMO hnuai a heng programme Mental Health, Tobacco Cessasion Clinic, ART leh OST te atang hian counsellor te a tul dan ang zel in rawn theih tur in an awm dawn a ni. Hemi atan hian GKC lam chuan Counselling Room tur an lo buatsaih a, Sr.CMO in a hawng nghal a ni.

           He MoU hi kum 2 chhung atana sign niin, ni 5 March 2025 atanga ni 28 February 2027 thleng awh tur a ruahman a ni.